विपद्मा परि मृत्यु हुनेको संख्या १७० पुग्यो

काठमाडौं । वर्षाका कारण आएको बाढी र पहिरोमा मृत्यु हुनेको संख्या १ सय ७० पुगेको छ । गृहमन्त्रालयका अनुसार आइतबार रातीसम्मको अपडेट अनुसार १ सय ७० जनाको मृत्यु भएको हो । अद्यावधिक विवरणअनुसार, ४२ जना अझै बेपत्ता छन् । बाढीपहिरोबाट उद्धार गरिएका १ सय ११ जना घाइते रहेको मन्त्रालयले जनाएको छ ।
त्यस्तै आइतबार काभ्रे, सिन्धुली, ललितपुरलगायतका जिल्लाबाट १६२ जनाको हेलिकप्टरबाट उद्धार गरिएको छ । काठमाडौँ प्रवेश गर्ने मुख्य नाका नागढुंगानजिकै रहेको झ्याप्लेखोलामा मात्रै ३५ वटा शव गाडीसँगै पुरिएको अवस्थामा फेला परेका छन् । नेपाली सेनाले हराइरहेकाहरुको खोजीलाई तिब्रता दिएको जनाएको छ ।